加到你唔信

從朋友傳來的『加薪加到你不信！』，基於種種原因，呢個故仔極之有可能與小弟有關。

由於一句「加到你唔信」，我開心咗三日。
由於一句「加到你唔信」，人長大了。

．．．

話說當年剛從外地畢業回流，由於當時 I.T. 界不景氣，很難找工作。在介紹底下，找到一份月薪 $7,000 的工作，工作要求是可能會上京工作。同期也有另一人，也是剛從外地畢業回流，也上京工作。

半年之際，某周三的晚上，老闆召了我們入老闆房，閂埋房門秘密地說：「我都知委屈咗你兩個架啦，不過我同你講，出年公司就會上市，到時就會加你地人工，會加返晒俾你，仲會加到你唔信添！」。

因為呢一句「加到你唔信」，我夢想著會有萬七蚊一個月，我開心咗三日。

舊 roommate 聽了，說：「加一蚊！加到你七千零一蚊，真係加到你唔信！」，就算被人潑冷水都好，起碼我真係開心咗三日。

之後我開始查考上市的事情，才發現，就算我曉飛，都無法幫公司達到所需的業績。然後，一班同事就日日講笑「上市上市上街市」。

半年後，有一晚我夢見劉德華做咗我阿哥，好似幫咗我或者救咗我（佢真係好人）。翌日，我返到公司就著手打辭職信辭工了。

．．．

會加人工加到你同我都唔信的老闆，可遇不可求，有實力的公司就有能力付出更高的薪金。職場上沒有不勞而獲的，頭兩年的工作經歷讓我知道工作上重要的事情：

一、公司未必會發掘人才，人才是會自行發掘並以行動証明自己。

二、上司永遠是朋友，因為，上司不可以是敵人。幫到上司等於幫到自己。

三、為公司帶來超越薪金的收益才算是「對得起份糧」，這是剛畢業時，一位博士老前輩向我說的金科定律：人工三倍。

想「加到你唔信」嗎？先做到以上三點吧。若然真的勞而不獲，檢討自己問題：一係無效率的勞，一係功不補鑊，一係勞而不達，一係生不逢時，或者係揀錯工（記著老闆永遠是對的）。不要以為自己懷才不遇，這念頭難以為自己帶來什麼益處。