繼續摘椰子

有個族長專門收留啲流落荒島嘅人，幫手摘椰子，因為成村人都係靠食椰子大。

摘椰子嘅人越來越少，最後剩返兩個，但係啲椰子樹就越生越高，啲椰子仲越來越難摘，而呢兩個人摘椰子嘅技巧就被迫地越練越高。基本上，成個島已經無人識得去掂呢啲樹，什至連族長都懶得再去爬樹咯。

某日，族長响島上發現咗一棵香蕉樹，於是叫其中一個人得閒時去摘兩隻蕉睇吓。族長講完之後，堆椰子樹即時標高咗。

為咗棵香蕉樹，族長於是出海撒網，網咗一個人返嚟摘椰子，諗住求其阿水都可以摘到一兩個椰子，咁就有其他人去摘蕉。過咗幾日，呢個人連樹都未爬到上去，就被椰子掟中咗，扁咗，浮返出海。咁果幾日少咗個人摘椰子，全村缺糧，唯有叫呢兩個椰子人一次過摘返少咗嘅椰子，仲要專挑啲大椰子，以平息民怨、穩定民心。

族長又再出海網咗個人返嚟幫手摘椰子，但係族長個心真係好想食蕉，於是的咗個新人去摘蕉。啲蕉生又得快，棵蕉樹又矮，搞到全村人都想吔，最後尾，連族長自己都去咗爬香蕉樹。

族長見摘蕉咁易，突然之間忘記咗原來摘椰子係一件好唔容易又好鬼死花時間嘅事。

都係食蕉好，慳水慳力丫嘛。所以俗語有一句「食蕉啦你」，即係「掂過碌蔗」咁解。

嗱嗱拿，小心啲呀，走開呀！唉唷，啱啱唔覺意擲爆咗個椰子。都話咗貪快咁高擲個椰子落去係唔得架啦，要時間爬上爬落嘛，鬼叫下面唔係沙灘咩。