Wednesday 14 May 2014

香港開個人公司手記(2)

上回講到(香港開個人公司手記(1)),我搵到個方法可以慳錢又即日開到公司,就係用註冊易。如果想無痛開公司,可以參考「香港Freelance Programmer開公司手記」。

第一步,去金鐘政府大樓高座十三樓登記一個註冊易帳戶。由於登記好快,只係要你張身份証,半個鐘之內都可以搞掂(我上次去冇乜人排隊),所以,應該以前在灣仔返工時行過去開定。

有咗個帳戶,就可以login入去搞。我第一次開,用Mac Safari,個Java似乎唔多work,load唔到佢哋個特殊app,唯有用 VirtualBox 裡嘅 Windows XP。相信好多用Mac做開發嘅兄弟已經裝咗 VirtualBox或者VMWare或者Parallel(我以前都分享過Parallel & VMWare,太貴了,後來改用 VirtualBox算數),並且搵到個正版Windows XP。記得要Update個Java VM。

(後來我再用 Mac Safari 去註冊易,又load到個Java Plugin,吹脹)

基本上,用呢個網都唔係太難,但一定要有耐性,有啲位click咗係冇反應,等一輪就會有反應。同埋記得,填form時要save起佢個VXF 文件。一個看似 PDF但原來唔係PDF,應該係政府搵唔知邊個開發商做嘅「e-Form Filler」。

呢隻App真係有bug,點解?因為你填晒啲資料後係print唔到出嚟!係,print到,但份表格有一半以上填咗嘅字係出唔到架!如果你真係要〞print〞出嚟,我諗只有用ScreenCap呢個方法,逐頁cap出嚟再print。咁就要睇你有幾大個Monitor....。(後記:我諗screencap返份文件呢個方法可能有問題,最好係去公司註冊處個網,俾少少錢買返份PDF落嚟,後面有提到點解要print返出嚟)

填form都唔太難嘅,首先決定自己係公司founder和director,秘書喎咁梗係搵屋企人做啦。如果你打算出面嘅秘書service,咁開公司都唔差少少錢搵人代勞啦。先問定你秘書嘅身份証號碼和地址。

填form有一個tricky位,就係「致商業登記署通知書」
呢一段寫得唔多清楚,至少我係唔覺佢解釋清楚,所以我一開始都揀錯,到咗「埋單」時先發現,原本以為$3970嘅費用一下子上到九千幾。

「是Yes」等於申請三年嘅商業登記,2014年三年就$6750。
「否No」等於只申請一年嘅商業登記,2014年一年就$2250。
(以上費用需要另加公司註冊費$1720)

在提交之前一定、一定要、一定要記得save一份去電腦。以後你需要靠呢個VXF文件去印返M&A。M&A係公司章程之類,有講到你公司嘅資本、股分、股東之類果份嘢。開銀行戶口必備。第二日你要開VXF,可以登入「註冊易」再click 下載 e-Form Filler。run個JNLP文件就ok。(後記:日後係有機會有人會問你要返份form,例如開銀行戶口時,我起初以為可以print,print唔到就screencap。後來諗諗吓,都係覺得呢個方法可能有問題,最終係去咗公司註冊處個網,俾少少錢買返份PDF落嚟,咁就一定冇死)

提交之後,就要網上付費。可以用PPS或者信用卡。我自己就用「D乜乜銀行」嘅CV+,呢啲政府嘢一般都係冇積分儲,用佢呢張卡就可以免息免手績費分期十二個月,一個月交三百幾,慢慢還。

交埋錢,一個鐘之內我已經收到電郵,有兩個 PDF,一個係 BR 一個係 CI。基本上公司已經開咗。可能我係在office hour內做,唔知如果晚上submit係唔係咁快。總之,一日之內已經搞掂。

下一步係,印綠盒(並非法律規定,不過唔印會好麻煩,唔印你都要造套公司印,銀行要),原來一套正常乜都齊綠盒最平大約只係要三四百。即係就算計埋車程,我都只係要花五百唔洗,比幫襯人哋慳一千啦。當然,要花少少時間。不過如果你有打算以後可能一個project一間公司仔,咁可能自己學吓都抵返嘅。

再下一步係,開公司嘅銀行戶口,呢個就係最麻煩嘅一環。

香港開個人公司手記(1)

在一間手機軟件公司工作咗十年,正如一些有工作經驗的Programmers,離開公司之後很不願意再次踏入另一個輪迴、另一個無間道。除非生活所迫(山窮水盡或者鐘意打工),否則點都想試吓自立門戶、接吓job、做個自由嘅freelance programmer,呃,時吓興叫「Freelance Developer」,anyway,點都係一樣。

朋友傳過來Max Chow的「開公司完全手記」(網址)有興趣可以參考,或者話,如果你打算睇我呢個post就應該先睇咗Max Chow的「開公司完全手記

參考其他人嘅做法,大概不外如下:


1. 決定自己公司名

如果係想開間一人有限公司,大概都係想建立個人品牌,咁冇乜可能係去買現成的公司名。如果決定好自己間公司叫咩名,呢個時候有三樣嘢要check:

  1. 香港嘅商業登記,睇吓有冇人已經用咗你呢個名。
  2. 香港嘅公司註冊處,一樣係睇吓有冇人已經用咗你個名。
  3. 全球的domain registrar,睇吓有冇人已經登記咗你個名做domain name。(如果可以買到.com,應該比買個.com.hk好。)


2. 決定公司登記地址

因為查冊係可以查到公司註冊嘅地址,所以街外有好多「Virtual Office」公司俾自己個office地址別人做登記用,佢哋可以代收信、代聽電話、做埋秘書。當然收費就有高有低。

我選咗一間有六七個地點嘅service provider,選咗佢哋中環個地址(居然係七個locations裡第二平)。佢哋都有開公司服務,七除八扣之後,最平係千二蚊但要十二個工作天先開到。俾多五舊可以縮到三日。呢千二蚊仲包一套基本box set綠盒。


3. 決定點註冊你間公司

無錯,要洗千幾二千蚊開間公司,未計政府嘅收費(以2014年4月起計,要$3970),到底值唔值呢?如果想平,又得唔得?

而家就講一個又平又快嘅方法,但正唔正就見人見誌。畢竟有人鐘意慳得就慳、有人鐘意請人做晒冇麻煩(見香港開公司完全手記(四):醒目地申請網址 (2)就知,乜都搵人做唔一定係好),我其實想快啲開咗間公司但又唔想俾咁貴嘅費用,結果俾我問到一個最平嘅方法。


註冊易

政府啲嘢呢,佢叫「註冊易」其實一啲都唔易用,不過呢個係唯一一個俾你以最快速度開立一個公司。

首先,你需要個人電子證書;要個人電子證書,你需要去郵局俾$50一年買一張證書,張電子證書係可以放响你個香港身分証嘅晶片度。咁放咗响身份証又點抄去電腦呢?你需要買一部讀智能身分嘅讀卡機,咁呢部嘢應該响郵局可以買到。最後,你需要一部Windows機,因為只有Windows driver!嘩,今時今日,做Freelance Developer梗係用Mac機啦,呢個世界上有邊個OS可以俾你一次過做晒iOS, Android, web service, Windows嘅 development?咁香港政府唔多支援Mac可以點?

其實,以上嘅工具、費用統統都唔需要俾。需要嘅,係去位於金鐘政府大樓高座13樓嘅公司註冊處,用佢哋部電腦上佢哋個網註冊一個「註冊易帳戶」,然後印咗份確認信,再去櫃台交form、俾個身份証佢核對一下你個身份就okay。半個鐘之後,就可以用呢個account去開公司戶口。


半個鐘搞掂

用註冊易開公司戶口,所有文件都係電子文件,沒有paper,但政府講明,自己印出嚟嘅BR和CI一樣有法律效力,如果你信、又想慳錢慳時間,你可以考慮呢個方案。如果想有政府印俾你嘅,可以自己上金鐘政府大樓高座搞,大概三四日就會寄返啲嘢俾你。如果你都係想有人代為效勞,咁搵出面嘅公司做,費用一千至一萬不等。真係適隨尊便。

點半個鐘搞掂?下次再講。(香港開個人公司手記(2))

Sunday 11 May 2014

男士侍產假,乜,有咁大影响咩?

如果,「男士侍產假」對勞工市場有咁重要影响,咁,「呢個世界冇話冇咗邊個唔掂嘅」呢一句可以從此消失。

如果,請三天假有咁大影响,我覺得所有議員係唔准請假咯,乜事都唔准請。仲乜事成日請假,搞到開開吓會唔夠人數,被人玩到流會?

如果,請三日假就影响到公司,咁,公司應該先要好好器重呢個員工,免得佢每季生病一次、每次請假一天、每年病咗四日、翌天未病好就返工再感染其他同事,然後再有人請病假,再交叉感染,再有人請假。。。

如果,今朝突然間病咗冇返工,公司係可以好混亂。但係,生仔起碼都六七個月前已經知啦,預知咗有人將要請假都處理唔到,好明顯係管理層問題多過係員工問題啦,咁炒咗個上司吧啦。

如果,要強調三天假會有好大影响,咁我哋應該計吓個影响有幾大,咪淨係話有又唔講係咩影响(以2013年統計數字):

(全年出生人口 57.1千人 x 3日)除以
(全年勞動人口 3873千人 x 男人比例 46.3% x 全年 232 工作日)
= 0.041175690426%

以一天八小時工作,呢0.04%等於全港所有男人一年內一齊做少45分鐘又51秒嘢。

如果,香港資源短缺到連呢45分鐘都俾唔起,咁啲睇相議員、轉珠議員應該賠償香港人嘅損失先啦。

如果,香港會因為少咗呢45分鐘而經濟有損失,咁,不如先立法:員工遲到要判監、員工返工做私人嘢要判監、員工開會時轉珠要判監。

如果,香港會因為少咗呢45分鐘而經濟有損失,同樣地,打工仔會因為OT而蒙受損失,咁,不如先立法:員工加班老闆要判監、員工私人時間做公司嘢老闆要判監、員工放工後聽老闆電話老闆要判監。

最後,一般可以申請男士侍產假嘅人,應該介乎20-40吧,呢批人在公司金字塔上爬到幾高、有幾舉足輕重嘅地位呢?如果冇乜,咁「多佢一個唔多少佢一個唔少」;如果有,咁佢就好重要,係咪應該一年送多幾日假優待吓佢呢?

其實,香港有幾多人有本事可以年年請一次?我諗大部份男士呢一世都只係可以請到一兩次。有啲人呢一世都未必請到一次,又有好多人已經再冇機會去請。


註:以五天工作,扣去17天法定假期和12天年假,一年最少有232個工作日,如果適逢紅日係週六,就會有更多工作日。如果適逢週末加班,又會有更多工作日。