Tuesday 3 June 2014

香港開個人公司手記(3)

公司開咗,綠盒訂咗,剩返個銀行戶口未開。

一般來說,銀行戶口都係喺同客人或合作伙伴有金錢出入時用。由於係有限公司,每年要搵會計師核數,即使只係一人公司都好,所以,要先符合會計師嘅「接job」要求,數目要分明、不用私人戶口(雖然好似唔係條條數都一定要經公司戶口)。

問題係,咁多銀行,邊間好?當然係要打吓價啦。有些銀行要求你先去預約,由於我情況比較趕,我最後冇揀啲大行,反正啲大行收費都幾貴。

以下係一般考慮嘅重點:


  1. 有冇網上銀行
    現時大部份銀行都有網上銀行,而且一般係唔會用網上銀行做過數,就算係「出糧」俾自己,為咗「咩都有單有據」,所以乜都係開支票、影印張支票、再入數。網上銀行只係方便望住條數。
  2. 開戶收費
    一般都有個查冊費,由二三百到七八百都有。
  3. 戶口最低存款
    在而家冇乜息,儲錢在戶口可謂係冇著數。但係好多銀行都要求有五萬以上,否則就收charge。都有啲銀行冇咁高限制,咁就睇你有冇preference揀銀行。
  4. 分行位置
    周不時可能要去銀行做啲paperwork,所以開戶嘅銀行最好係就近嘅。
  5. 有冇外幣戶口
    因為App 嘅Stores可能係用外幣找數,所以外幣戶口就有需要喇。不過都係果句:唔係所有收入都一定要入公司戶口,所以可以用自己戶口去收數。但所有支出都應該用公司戶口出票喇。
  6. 開戶、查冊時間長短
    如果等住個公司戶口用,咁銀行查冊開戶時間都好影響。最怕佢最後話唔批。
  7. 要唔要授權多一個人簽名
    視乎你個人嘅情況,冇一定既好壞嘅。
在我周圍格價時,發現有啲銀行要「有人介紹」先俾你開戶,有啲就「有人介紹」或「已有個人戶口」,有啲銀行(大行)佢個公司戶口成日排長龍,用著呢啲銀行,他日去呢啲銀行都幾麻煩,排親都一個半個鐘。

記住,所以開支,包括商業登記、公司註冊、開銀行戶口查冊、租virutal office、印綠盒等等,全部都可以報銷(即係唔洗自己錢、報銷咗又唔洗交稅)所以記住乜單都要keep,如果係熱敏紙,因為會褪色,所以記得影印。